پنجاب سرکار نے اپنے ای بنائے لوکل گورنمنٹ قانون نوں اک آرڈیننس راہیں التھ دتا اے پر ایس التھے وچ وی ایہہ خیال سرپر رکھیا اے بئی پنڈاں دا انتظام کدھرے سرکاری ذمہ واری نہ بن جاوے۔ بوہت ساریاں چنگیاں ماڑیاں بھوت پھیریاں والے ایس آرڈیننس وچ لکھ دتا گیا اے کہ بھانویں پنڈاں دیاں کونسلاں ہن لوکل گورنمنٹ اکھواسن پر پنڈاں دی صاف صفائی، پین دے پانی اتے نکاسی دا انتظام کونسلاں ولوں بنائیاں پنچائتاں دے حوالے ہوسی جیہڑیاں لوکائی تے واش لا کے ایہہ کم چلاسن۔ رب دے بندیو، جے واش نال ای کم چلنا اے اتے پنڈاں والیاں آپ ای چلانا اے تے فیر ایہہ کم تے پہلے ای ہندا پیا اے۔ پنڈاں والیاں لئی الیکشن نرے کبڈی دے میچ وانگر نیں جیہناں وچوں کھیڈ توں ودھ کوئی لابھ نہیں جڑ دا۔ واش تے کمیونٹی انتظام ایناں ای چنگا لگدا جے تاں شہراں وچ بلدیہ، میونسپلٹیاں اتے ڈیولپمنٙٹ اتھارٹیاں مکا کے کمیونٹی چندے نال کم چلائو نہیں تے پینڈو وسیب نوں وی سانواں من کے ایہو جیہے ادارے دیو۔ پنڈاں نوں منتخب لوکل گورنمنٹاں نالوں ایسٹیبلشڈ لوکل گورنمنٹ اداریاں دی ودھیری لوڑ اے۔ جے ایہہ نہیں جے کر سکدے تے اینویں ایس کھیڈ وچ پنڈاں نوں نہ گھسیٹو تے اپنے نظام تے قانون شہراں تک ای رکھو جیویں تسیں عزت دار زندگی دیاں سبھے سہولتاں شہراں تک محدود رکھیاں نیں۔
pindsudhaar.org
