خبراں نیں بئی پنجاب سرکارستھرا پنجاب آہر نوں قنون ہیٹھ
لیاون دا سوچ رھی اے۔ انج تے نجکاری دے ایس آھر دا مڈھ بنھن توں پہلاں ای ایہنوں اسمبلی وچ لیانا بن دا سی پر چل ہئوو۔ ہن ای گل کر لئو۔ انج ایسے اسمبلی نے پچھلے دنیں لوکل گورنمنٹ دا نواں قنون وی پروانیا اے۔ بھانویں اوہدی پروانگی نری ایسے لئی ہوئی اے کہ صوبے وچ پچھلے گیارہ ورھیاں توں نہ ہوون والے لوکل الیکشن کجھ ہور سال کراہے پئے جاون پر صاف صفائی تے کوڑا کرکٹ وی تے لوکل مدعا ای اے نا۔ ایہہ لوکل گورنمنٹ قنون وچ کیوں نہیں پائیا؟ ایہدے واسطے وکھرے قنون دی کیہہ لوڑ اے؟
تھوڑا گوہ تے نیجھ نال ویکھو تاں صوبے وچ گورننس دا اصل سنکٹ ھے وی ایہی بئی لوکل گورنمنٹ دے کسے مدعے نوں لوکل گورنمنٹ دے قنون وچ نہیں پاونا متاں لوکائی دے لوکل نمائندیاں نوں کوئی جھوٹھا سچا اختیار دیونا پئے جاوے۔ ویکھو ناں سکول ، تعلیم تے سکھیا لوکل مدعا اے پر گورننس وچ ایہدی دیکھ ریکھ ، سربندھ پربندھ تے نگرانی سبھ کجھ کیہدی ذمہ واری اے؟ صوبے دی سرکار دی۔ صحت تے مال پٹوار توں لے کے زراعت تے آبپاشی تیک سب کجھ صوبے کول ھے۔ پولس وی ڈائریکٹ لہوروں ای مینج ہندی اے۔ لوکل گورنمنٹ وچ ایہناں مدعیاں دی مناہی اے۔
سوال ایہہ وے بئی فیر لوکل گورنمنٹ کول بچدا کیہہ اے جدوں سب کجھ تے لہور نے کرنائے۔ تکے لائیے تاں پانی، نکاس، صاف صفائی ، سڑکاں، قبرستان، پارک، اڈے، تہہ بازاری وغیرہ ہوسن۔ کجھ صوبیاں وچ ایہہ لوکل گورنمنٹاں کول نیں پر ساڈے کول صاف پانی دی سرکاری کمپنی اے، صاف صفائی والے ستھرا پنجاب دی وکھری کمپنی اے۔ پارک، قبرستان تے شہراں دی خوبصورتی لئی صوبے دی سرکار ہیٹھ چلن والی پنجاب ہارٹیکلچر اتھارٹی اے۔
اتھارٹی توں چیتے آئیا بئی وڈے شہراں وچ اتھارٹیاں نیں، لہور ڈیولپمنٹ اتھارٹی،ملتان دی اتھارٹی تے پنڈی دی اتھارٹی۔ ایل ڈی اے، ایم ڈی اے تے آر ڈی اے دے وی اوہی کم نیں جیہڑے لوکاں دیاں چگیاں لوکل گورنمنٹاں دے ہوندے نیں پر ایہہ اتھارٹیاں تے ڈائریکٹ صوبے دے ماتحت نیں۔ فیر لوکل گورنمنٹاں کول ھے کیہہ؟ یونین کونسل؟ جیہڑی پیدائش، ویاہ تے مرگاں دا حساب رکھدی اے پر ایتھے وی کھڑ جاؤ۔ یونین کونسلاں وچ جمن پرچی، ویاہ تے موت دے سرٹیفیکیٹ یونین کونسل نئیں سگوں وفاقی ادارہ نادرا ولوں جاری ہندا اے۔ ایہناں نمانیاں تے اعتبار ای کدوں اے ریاست نوں۔ جے لوکاں دیاں چگیاں ہوئیاں لوکل گورنمنٹاں ورھیاں بدھی نہ ہوون تے کل خلق چپ اے تے سچی چپ اے۔ الیکشن کرا کے وی ایہناں وچارناں کول کیہہ آ جانا اے؟
سرکار دی چھترچھاویں ہوون والی پرائیویٹائزیشن اپنی تھاویں، صوبے وچ ہزاراں دے حساب وچ پھٹن اگن والیاں کالونیاں وچ امن امان، پانی، نکاس، بجلی، سڑک، پارک، قبرستان، عبادت گاہ، سب کجھ کالونی مالکاں دے ہتھ اے جیہڑے لوکاں کولوں ایہناں سیواواں دے عوضانے وچ پیسے لیندے نیں۔ سٹیٹ ودان سٹیٹ state within state دا ایہہ نواں روپ اے۔ کجھ کالونیاں تاں گیٹ تے آون والیاں دے شناختی کارڈ تک سکین کر دیاں نیں جیویں بنک کھاتا کھولن لگیاں کر دے نیں۔ وچلے میل نوں سکھ دے ایہہ جزیرے دیون نال سموچا سماجی ریشا ادھڑ ریہا اے تے اک طبقے دی دوجے طبقے توں بیگانگی وی ودھ رھی اے تے نفرت وی۔
کجھ وی ہووے، لوکل گورننس تے سرکاری تے نجی مل ماری نال لوکائی لئی لوکل گورننس دا اصل مہاندرا ای وسر دا پیا اے جیہدی نکی جیہی جھاکی اسیں اک جرنیل دے مارشل لاء ہیٹھ تاں ویکھ لئی سی پر ساڈیاں اپنیاں سرکاراں اوہنوں ساڈے لئی اکھوں پروکھے کر دتا اے۔ صوبے وچ لوکل الیکشن ہو وی جان تاں وی اوہ اک فٹ بال میچ ورگی انتخابی دلچسپی توں اگے نہیں جان لگے۔ پتا نہیں کدوں صوبیاں دی اشرافیہ طاقت تے اختیار نوں تھلے تورے گی۔
