نویں لوکل گورنمنٹ قنون ہیٹھ پنجاب سرکار کونسلاں کٹ دتیاں نیں۔ لاگلے سگوں دورلے پنڈاں نوں وی شہراں دیاں کونسلاں دیاں حداں وچ رلا کے شہراں دا گھیرا پیٹا وڈا کر دتا گیا اے۔ ایہناں پنڈاں وچ پراپرٹی والیاں دا کم ودھیا چمکے گا کہ واہی وان تاں دوہیں ہتھیں بھوئیں نوں ویچنا پھوکنا چاہندے نیں کہ پچھلے تن ورھیاں توں فصلاں لگاتار گھاٹے وچ جا رہیاں نیں۔ کونسلاں کٹن توں اگلا کم الیکشن دی حلقہ بندی اے۔ جے سرکار، سرکاریے، سیاست تے سیاستیے حلقے بندی وچ وی اونی دلچسپی لین جنی اوہناں شہر وڈے کرن وچ لئی اے تاں خورے ایس قنون ہیٹھ الیکشن وی ہو جان۔ انج پچھلے ست ورھیاں وچ اجیہے پنج قنون اتے کونسل تے حلقہ بندیاں دیاں کئی ورزشاں کسے دھی پت دے کم آئے بنا ای صوبے دی بدنیتی دے ڈھائے چڑھ چکیاں ہن۔ الیکشناں دی آس تے ہن سک سدھر ای رہ گئی اے، اوہ وی ساڈے ورگے چسکولیاں لئی۔ سیاسیاں وچ تاں الیکشناں دی نہ تانگھ اے نہ مانگ۔انج ایہہ دسنا بن دا اے بئی ملک دے سبھ توں وڈے تے چمکدار صوبے وچ لوکل الیکشن اج توں دس سال چار مہینے پوند ہوئے سن۔ یارھاں سال ہوون وچ کجھ ای مہینے رہ گئے نیں۔ الیکشناں وچ یارھاں سال دا وقفہ انج وی ساڈی ریت اے۔ نہیں؟
pindsudhaar.org
