پنجاب دے پنڈاں دے انتظام دی ذمہ داری گورنمنٹاں نئیں چک دیاں۔ قصبیاں وچ میونسپل کمیٹی، نکے شہراں وچ میونسپل کارپوریشن تے وڈے شہراں وچ میٹروپولیٹن کارپوریشناں بن دیاں نیں۔ ایہناں دے الیکشن ہون نہ ہون، ایہناں دا دفتر، عملہ، کم تے فنڈ نہیں گھٹ دے۔ لہور، فیصل آباد، ملتان تے پنڈی وچ تاں ڈیولپمنٹ اتھارٹیاں وی نیں جیہناں کول کئی کئی ضلعیاں برابر فنڈ ہوندا اے۔ ایہہ سارے ادارے رل کے شہراں نوں انساناں دے رہن دے قابل وستیاں بناندے نیں۔ پنڈاں کول ہے ضلع تے تحصیل کونسلاں ہیٹھ یونین کونسلاں۔ یونین کونسلاں کول اک سیکرٹری ہندا اے جیہڑا لوکاں توں چٹی لے کے جمن پرچی تے طلاق نکاح دی نقلاں دیندا اے۔ جے کدی الیکشن ہو جان تاں ضلع تحصیل کونسلاں کول پیسے اپڑ دے نیں جیہڑے اوہ نویاں اٹاں روڑے پنڈاں تے تھپن وچ لا دیندیاں نیں آپنا کمیشن کھرا کرن لئی۔ نہیں تے ایہناں دے دفتراں دا وی اوہو ای حال ہوندا اے جو پنڈاں دا اے۔ نخصمے، نکڑمے۔ گورنمنٹاں دے ایس وتکرے نے پنڈاں نوں تہذیب تے ماڈرن لائف دی روڑی بنا چھڈیا اے جتھے رہن زندگی کٹن نہیں سگوں جون بھوگن، نرگھ کٹن بن جاندا اے۔
ایہہ جیہڑا چمکیں گے دیہات پروگرام والا نواں چھنکنا پنڈاں نوں پھڑایا گیا اے، ایہہ وی اوہی کمیونٹی ذمہ واری وچ سرکار نے یوگ دان پان دا ڈرامہ کیتا اے۔ مقصد اک پارٹی دے کارکناں دے منہ نوں مڈی لانی اے ٹانجو اوہ الیکشن کیمپین سوکھی کر سکن۔
پنڈاں نوں روڑی توں وستی بناون دا حل سدھا تے سادھارن اے۔ ہر پنڈ نوں سرکار عملہ تے مشینری دیوے جیہدی نگرانی کونسلر تے ناظم چئیرپرسن کرن۔ ہر پنڈ نوں کونسل دتی جاوے تے نالے فنڈ وی۔ فنڈ، عملہ تے مشینری مستقل ہوون۔ بھانویں الیکشن ہون جاں نہ ہون انتظام چل دا رہوے۔
اچھا ایہدے تے خرچہ آئے گا۔ شہراں تے وی تاں آندا اے۔ جنے کو ٹیکس شہراں والیاں نوں پین دے پانی، سکول، صحت دیاں سہولتاں تے سڑکاں دی مرمت، پارکاں تے روزانہ وار صفائی دے لائے نیں، اوہ ساڈے تے وی لا دیئو۔ دگنے لا دیو بھاویں۔ خوشی خوشی دیساں۔
الیکشن سر تے نیں تے پارٹیاں امیدواراں تہاڈے بوہے ٹھکورنے نیں۔ پنجاب اسمبلی دی ممبری واسطے کھلوون والے لوکاں نوں ایہہ منگ پہنچاو کہ پنڈاں نوں تسلیاں نہیں ادارے دیو، پارک دیو، روزانہ صفائی دیو، روزانہ صاف پانی گھراں وچ پہنچا کے دیو، ڈسپنسریاں دیو، سکول دیو۔ ایہناں نال تحریری معاہدے کرو۔ پورے پنڈ دے سامنے تحریری معاہدیاں تے دستخط لئو کہ ممبر صاحب پنجاب اسمبلی وچ ایہہ بل پیش کرن گے۔ الیکشن دا مدا ایہے بنائو۔ نہیں تے پنڈ تہذیب دی روڑی بنے رہن گے۔چچہ وطنی توں دو ستھاں ایکتا سوسائٹی اتے سانجھ ایس مدعے تے بھرواں کردیاں پئیاں نے ایہناں دوہاں ستھاں نے پنجاب اسمبلی دے سارے ممبراں نوں چٹھی لکھ کے اوہناں دا دھیان وی ایس مدعے ول کروایا اے تے نال دے نال لوکل گورئمنٹ ایکٹ بناون وچ پینڈو وسیب ولوں سجھا وی دتے نے جیہڑے کہ حمزہ سرکار نے لوکل گورئمنٹ ایکٹ بناون واسطے پنجابی دی لوکائی کولوں منگے سن
pindsudhaar.org
