پنجاب دی اپجائو دھرتی کنکریٹ دے کٹک دی دھاڑ ہیٹھ آئی اے۔ بھانویں اینے کنے غوری ابدالی بھگتائے ہوون پر ملک ریاضاں دی ایہہ یلغار بڑی ڈاہڈی اے۔ سموچے دیس پنجاب وچ اکو ای کاروبار اے پراپرٹی ڈیلری تے اکو ای ودھدا پھلدا دھندہ اے کہ کیویں وگدی بھوئیں تے کالونی کٹی جاوے۔ ہر پکی سڑک تے جیویں کالونیاں دا ٹورنامنٹ ہو رہیا ہووے۔ شہر دی نیائیں دی نیائیں دی نیائیں وی سبزیاں تھاویں کالونیاں اگاندی اے۔ پنڈاں دیاں نیائیاں وی پلاٹ ای جمدیاں نیں۔ کوئی دن جاندا اے کہ سانوں کنک گڈن لئی جگہ نہ ملسی۔ کھیتی کرسان نوں لابھ وجہوں ککھ نہیں دیندی۔ بزنس دی کسے وی کسوٹی تے ساڈی واہی پوری نہیں لہندی۔ چھماہی پچھوں محنت وی بچ جائے تے دھن اے۔ بھوئیں دی مالکی دا ہور کوئی ثواب وی نہیں۔ واہی بیجی لئی وکن وکان والی پیلی مُل وی کوئی نہیں کھوہندی۔ سو ہر مالک ایہہ تانگھ دا اے بئی اوہ کسے طریقے اپنی زرعی زمین نوں رہائشی زمین بنا کے مرلیاں دے حساب نال ویچ دیوے۔ انج پنج دس مرلے وی کلے دا مل پائوندے نیں۔ کھیتی کر کے اینے پیسے زمین وچوں تاں کسان دیاں کئی پیڑھیاں نہیں کما سکدیاں۔ اتوں ہر پیسے والا انویسٹر رئیل سٹیٹ توں وکھ کسے بزنس دا رسک لین تے تیار نہیں سو خریدار وی ہے وے بھانویں کالونیاں تے پلاٹ سالاں بدھی ویہلے پئے رہندے نیں۔ سو بلڈوزر چل رہے نیں، کالونیاں دے سوہنے سوہنے گیٹ بن رہے نیں تے پنجاب دی کنک کپاہ کدھرے دور رہندی جا رہی اے۔ واہی لئی تے لگدا نری اوہ ہی بھوئیں بچسی جیہڑی کسے پکی سڑک، شہر جاں پنڈ توں چوکھی دور ہوسی۔
pindsudhaar.org
